古天樂與林國斌前日在中環型爆拍攝新片，為免阻塞交通拍了三分鐘便閃人。另外，古天樂推跌劉青雲令他後腦着地的片段昨日曝光，錯手的古天樂被嚇得O嘴當場。
古天樂（古仔）和林國斌前日在中環為陳木勝執導新片《掃毒》（前名《變戰》）拍攝外景。古仔架上墨鏡cool爆駕駛名車在路邊等候，未幾身形同樣fit爆的林國斌「爆肌」上車後絕塵而去。現場不少途人圍觀需要封路拍攝，亦有警員幫手指揮交通。整個拍攝過程不足三分鐘，整隊攝製隊便「快閃」離場。
嚇到當場O嘴
另外，早前古天樂拍攝一場推撞戲時，將劉青雲整個推倒地上並頭着地，嚇得古仔當場「O」嘴並立即趨前攙扶。只見墮地的劉青雲不停按着後腦位置，張家輝立即拿椅子讓他休息。而電影昨日在九龍灣舉行開鏡禮，古仔憶述說：「我當時都好驚，嚇咗一吓。見佢又紅又腫，叫佢入院照吓。點知佢同我講，仲記得自己係張家輝添。」劉青雲說：「當時張家輝不停睇我頭頂報告情況，好煩！（腦震盪？）依家都喺度，冇事。唔好唔記得對白就得。」
讚補習老師索
張家輝透露戲中很早便死掉，問到是否收足片酬，他說：「梗係，要積好耐陰德先有呢啲機會！」談到有指他落力催谷女兒成材，他說：「我唔知，不過有時返家都見到啲補習老師，乜咁正嘅。老婆話，係呀依家啲老師好年輕o架。搞到我都想補吓。（補乜？）補吓個腦、肝同腎。」在旁古仔即偷笑說：「腎都有得補？你喺出面補呀？」素顏到場的內地女星袁泉，透露戲中與古天樂為一對，問到有否親熱戲，她說：「戲中我懷了孕，要好好保護寶貝，所以沒有！」
沒有留言:
張貼留言
注意：只有此網誌的成員可以留言。