由陳木勝執導、洪金寶擔任動作導演，投資2億5千萬港元製作嘅動作電影《危城殲霸》，今日喺杭州進行拍攝，舉行發佈會之餘，演員嘅造型及花5個月搭建嘅場景亦首次曝光，製作片段亦首次發放。
演員劉青雲、古天樂、彭于晏、吳京、廖啟智、姜皓文、袁泉、江疏影、洪天照及吳廷燁，均有出席發佈會，兩個導演都異口同聲話，今次係最辛苦嘅一次拍攝。
劉青雲今年憑《竊聽風雲3》奪得金像獎影帝，青雲喺台上話會挑戰動作電影，而今次劉青震喺戲中就擔任保衛團首領，手執長鞭作為武器，實現拍動作片嘅承諾，20年冇拍動作戲嘅青雲話：「今次好多高手，所以一定要嚟。」相隔20年冇演動作戲嘅青雲話：「今次拍動作戲好玩，睇到拍攝嘅方法真係大開眼界，我拍攝之前花咗幾日訓練，學習用皮鞭同一啲基本功，開頭有打到自己，我要嚟練習嘅皮鞭有兩米幾長。」
身旁嘅古仔取笑青雲話：「嘩！你兩米幾長！」問到古仔係唔係好羨慕，古仔鬼馬回應：「咁長畸形嘅，梗係唔羨慕。」青雲話每逢佢埋位拍攝，佢都係全場最危險、最富攻擊性嘅演員。
今日係青雲嘅結婚周年紀念日，青雲話太太郭藹明都有飛到杭州探班陪佢，青雲又話噚晚一齊出去食飯撐枱腳慶祝。問到青雲今日係幾多年結婚紀念，青雲笑說：「都好新鮮嘅。」
沒有留言:
張貼留言
注意：只有此網誌的成員可以留言。